‘ઘર ઘર ગૂંજે ગીતા’ થકી કચ્છમાં કૃપ ગુરુકુલના વિદ્યાર્થીઓએ રચ્યો ભક્તિ, જ્ઞાન અને કર્મનો ત્રિવેણી સંગમ | Ghar Ghar Gunje Gita movement by Krup Gurukul | Top Stories 2024

કચ્છના ગિવ વાચા ફાઉન્ડેશન, કૃપ મ્યુઝિક, ઇઝી આઈડી અને કૃપ ગુરુકુલ દ્વારા હાલમાં ચાલી રહેલા ગીતા જયંતી પર્વ અંતર્ગત સંસ્થાની કોલેજ અને ગુરુકુલના વિદ્યાર્થીઓ એ ‘અર્જુન’ બનીને અંજારના વિવિધ સ્થળોએ ‘ઘર ઘર ગૂંજે ગીતા’ નું આયોજન કર્યું. જેમાં ગાયત્રી સોસાયટી, કનકેશ્વર મંદિર અને પ્રજાપતિ સોસાયટીના વિવિધ સ્થળો નો સમાવેશ થાય છે. તેમને પ્રોત્સાહન આપવા માટે સંસ્થાના પ્રણેતા ડૉ. કૃપેશ ઠક્કર, ટ્રસ્ટી શ્રીમતી નયનાબેન ઠક્કર અને ગુરુકુલના આચાર્યા ડૉ. પૂજા ઠક્કર હાજર રહ્યા હતા.

ભગવદ્ ગીતાના વ્યાવહારિક ઉપયોગના કોલેજમાં શીખેલા જ્ઞાનને અનુસરતા વિદ્યાર્થિનીઓ પ્રિયાબેન પ્રજાપતિ, અંજલીબેન સેવક, નૈઋતીબેન શેઠિયા અને લતાબેન ઓઝાએ કર્મયોગની પહેલ કરી હતી. જેમાં અન્ય વિદ્યાર્થીઓ પણ સાથે જોડાયા. દરેક કાર્યક્રમની શરૂઆત ગૂંજે ગીતાના બાળ એમ્બેસેડર પર્વ ઠક્કર અને વાચા ઠક્કર સાથે ગુરુકુલના બાળકોએ પ્રાર્થના સાથે કરી હતી. ત્યારબાદ આમંત્રિત મહેમાનોએ સાથે મળીને સંગીતમય ગૂંજે ગીતાનું પારાયણ કર્યું હતું. આ સાથે જ કોલેજના વિદ્યાર્થીઓએ જ્ઞાન, ભક્તિ અને કર્મયોગના સ્વાનુભવ વ્યક્ત કર્યા.

આ પ્રસંગે શ્રીમતી નયનાબેન એ કહ્યું કે, “ગૂંજે ગીતા શતક મહોત્સવમાં એક સો કાર્યક્રમ પૂર્ણ કર્યા બાદ લોકોના બહોળા પ્રતિસાદને આવકારી સંગીતમય ગીતાને હર ઘર સુધી પહોંચાડવા ‘ઘર ઘર ગૂંજે ગીતા’ અભિયાન શરૂ થયું. જેમાં સંસ્થાના ગિફ્ટ ઓફ ટાઈમ એમ્બેસેડર સદસ્યો પોતાનું નોંધપાત્ર યોગદાન આપે છે.”